कीर्तिपुर, माघ २५
कीर्तिपुरस्थित ल्याबोरेटरी स्कूलको व्यवस्थापनमा माघ २५ गतेदेखि २७ गतेसम्म सञ्चालन हुने चौथो नगरस्तरीय राष्ट्रपति रनिङ शिल्ड प्रतियोगिता आज भव्य र आकर्षक समारोहका बीच समुद्घाटन गरिएको छ।
ल्याबोरेटरी स्कूलको खेल मैदानमा सम्पन्न उद्घाटन कार्यक्रममा कीर्तिपुर नगरपालिकाका नगरप्रमुख कृष्णमान डंगोल प्रमुख अतिथि रहनुभएको थियो भने उपप्रमुख शुभलक्ष्मी शाक्य विशेष अतिथिका रूपमा सहभागी हुनुहुन्थ्यो। नगरका विभिन्न विद्यालयका प्रधानाध्यापक, शिक्षक, विद्यार्थी, अभिभावक तथा खेलप्रेमीहरूको उल्लेख्य उपस्थिति रहेको थियो।
उद्घाटन समारोहलाई सम्बोधन गर्दै नगरप्रमुख डंगोलले खेलकुदलाई कीर्तिपुर नगरपालिकाले उच्च प्राथमिकतामा राखेको उल्लेख गर्नुभयो। उहाँले विद्यार्थीको सर्वाङ्गीण विकासका लागि खेलकुद अपरिहार्य रहेको बताउँदै नगरपालिकाले विद्यालयस्तरको खेलकुद प्रवर्द्धनमा निरन्तर सहयोग गर्ने प्रतिबद्धता व्यक्त गर्नुभयो।
त्यसैगरी उपप्रमुख शाक्यले राष्ट्रपति रनिङ शिल्ड प्रतियोगिताले विद्यालय तहबाटै प्रतिभावान खेलाडी पहिचान र क्षमता अभिवृद्धिमा महत्वपूर्ण भूमिका खेलेको बताउनुभयो। खेलकुदले अनुशासन, आत्मविश्वास र नेतृत्व विकासमा सहयोग पुर्याउने उहाँको भनाइ थियो।
कार्यक्रममा ल्याबोरेटरी स्कूलका प्रधानाध्यापक डा. लाक्पा शेर्पाले विद्यार्थीलाई केवल पाठ्यपुस्तकमा सीमित नराखी रुचि र क्षमताअनुसारको अवसर प्रदान गर्नुपर्ने आवश्यकता औँल्याउनुभयो। विद्यालय तहकै खेलकुद प्लेटफर्मबाट राष्ट्रिय तथा अन्तर्राष्ट्रिय स्तरका खेलाडी उत्पादन भई नेपालको पहिचान विश्वमाझ स्थापित भइरहेको उहाँले बताउनुभयो।
कीर्तिपुर नगरभित्रका सम्पूर्ण विद्यालयहरूको सहभागितामा सञ्चालन भइरहेको यस प्रतियोगिताले विद्यार्थीहरूको खेलकुद क्षमता विकास, आपसी सद्भाव र प्रतिस्पर्धात्मक भावना अभिवृद्धि गर्ने विश्वास लिइएको छ।
कार्यक्रमको सफल आयोजनामा सहयोग पुर्याउने सम्पूर्ण अतिथि, सहभागी विद्यालय, शिक्षक, विद्यार्थी तथा आयोजक टोलीप्रति आयोजक विद्यालयले हार्दिक धन्यवाद ज्ञापन गरेको छ।
